Dənizləri neft çirklənməsindən təmizləyəcək xüsusi süngər yaradılıb

Kanada və ingilis alimlərinin yaratdığı xüsusi texnologiya dənizlərin çirklənməsinin qarşısını ala bilər

Kanadanın Toronto və İmperial Universitetində Dr. Pavani Çerukupallinin başçılığı ilə aparılan tədqiqat zamanı neft çıxarılması zamanı dəniz suyunun çirklənməsinin qarşısını alacaq xüsusi süngər yaradılıb.

Hər il dəniz döşəməsindən neftin çıxarılması zamanı xırda neft damcılarının suya qarışması nəticəsində 100 milyon barrel həcmdə su çirklənməyə məruz qalır.

Dənizi neft tullantılarından təmizləmək üçün edilən cəhdlərin böyük əksəriyyəti yalnızca irihəcmli üzən kirlərin qarşısını almaqla kifayətlənir, xırda damlaları təmizləmək üçün kifayət etmir. Buna görə də elm adamları yeni və daha effektiv texnologiyanın yaradılması üzərinə işləyirdilər.

İndi isə Toronto Universitetinin və London İmperiya Kollecinin tədqiqatçılarının müştərək səyləri nəticəsində cəmi 10 dəqiqə ərzində sudakı ən xırda neft damlalarını belə 90% özünə hopdura bilən yeni süngərin yaradılmasına müvəffəq olunub.

Süngər nefti özünə hopdurandan sonra nefti ondan asanlıqla çıxarmaq olur. Beləliklə də çıxarılan neftin yenidən emal prosesindən keçirilməsi, süngərin isə yenidən istifadə edilməsi mümkün olur.

Hazırda Dr. Çerukupalli və digər tədqiqatçılar süngərin qaz, mədən və tekstil sənayelərində istifadəsini təmin etmək məqsədiylə süngəri daha da təkmilləşdirməya çalışırlar.