6,000 il əvvəl Daş Dövründə yaşamış qadının DNT-si əldə edilib

Şəkildəki 6,000 il əvvəl Skandinaviyada yaşamış qadının görünüşüdür, bir sənətkar Lola adı verilən qadının rekonstruksiyasını hazırlayıb.

Daş Dövründə yaşayan qadının "qədim saqqızda" qalan diş izlərinin sayəsində alimlər onun DNT-sini çıxarmağa və beləliklə də onun genetik kodunu deşifrə etməyə nail olublar.

Tədqiqatçıların açıqlamasına görə, ilk dəfə qədim bir insanın bütöv genomunu onun sümüyündən qeyri bir yerdən əldə etməyə nail olublar.

Böyük ehtimalla onun tünd dəri rəngi, tünd qəhvəyi saçları və mavi gözləri olub.

Kopenhagen universitetinin tədqiqatçısı Dr. Hannes Şroder deyib ki, əslində, ağacdan qoparılmış qətran olan "saqqız" qədim DNT üçün çox vacib bir mənbə olub, xüsusilə nəzərə almaq lazımdır ki, əlimizdə bu dövrlərə aid insan qalıqları mövcud deyil. "Sümükdən qeyri bir mənbədən bütöv qədim insan genomu əldə etməyimiz möhtəşəmdir", - deyə, tədqiqatçı vurğulayıb.

Qadının bütöv genetik kodu, yaxud genomu deşifrə edilib və onun necə göründüyünü müəyyən etmək üçün istifadə edilib. Ümumilikdə o, genetik baxımdan həmin dövrdə mərkəzi Skandinaviyada yaşayanlardan daha çox quru Avropasının ovçu-yığıcıları ilə daha yaxından bağlıdır və onlar kimi tünd dəri rənginə, tünd qəhvəyi saçlara və mavi gözlərə malik olub.

Mütəxəssislər bildirirlər ki, çox güman o, buzlaqların çəkilməsi ilə Qərbi Avropadan köçənlərin populyasiyasının törəməsi olub.